KZguneak 2024ko jarduera-memoria argitaratu du

2024 honetan, KZguneak bere formakuntzak eguneratu ditu, IAren edo fake news-en gaineko jakintza bezalako behar sozial berriei erantzuteko.

KZguneak 2024ko jarduera-memoria argitaratu du. Bertan, urtean zehar egindako ekintzak eta ekimenak zehazten dira, eta eskaintzen dituen formakuntza-modalitate guztiei buruzko urteko datuak iragartzen dira. KZguneak 2024ko jardueran bere formakuntzak egokitu izana nabarmendu du, besteak beste, adimen artifizialen ezagutzan eta erabileran sakontzeko edo albiste faltsuak detektatzeko.

KZgunea sarea erreferentzia-puntu gisa finkatu da, non pertsonek kalitatezko formakuntza jaso eta teknologia berrien arloan aholkularitza pertsonalizatua lor dezaketen. Bizilekua eta ezagutza teknologikoaren maila edozein dela ere, beti dago KZgunea gertu formakuntza jaso ahal izateko. 2024an, 63.333 pertsonak jaso dute zerbitzuren bat KZgunearen eskutik; horietatik % 54,4 emakumeak dira eta % 44,6 gizonak. Pertsona aktibo horietatik, 2024an 37.857 berriak izan dira, 16 urtetik aurrerako adin-tarte guztietakoak.

2024 nabarmendu da KZgunearentzat, Berreskurapen, Eraldaketa eta Erresilientzia Planaren (PRTR) Espainiako estrategiarekin bat datozen ahaleginengatik, 19. osagaiaren barruan, herritarren formakuntza eta inklusio digitala bermatzea helburu duena, gizartearen eta ekonomiaren eraldaketa digitaleko prozesuan inor atzean utzi gabe. KZguneak lanean jarraitzen du 2020 eta 2026 bitartean EAEko 30.248 pertsonari gutxienez formakuntza emateko.

KZgunearen informazio-sistemek ere berrikuntzak izan dituzte: EAEko hainbat herritan kokatutako KZguneetan gertatutako aldaketei laguntza teknikoa emateko lan egin da, eta hala eskatu denean ekipamendua eta azpiegitura eman dira.

2024an eskainitako formakuntzari dagokionez, erabiltzaileek gehien eskatzen dutena aurrez aurreko ikastaroak dira, hezitzaileekiko hurbiltasuna baloratzen baitute: 58.458 ordu eman dira aurrez aurreko formakuntzan, 2023an baino ia 10.000 gehiago. Gaiari dagokionez, aurreko urteetako joerari jarraituz, oinarrizko formakuntzako ikastaroak dira gehien eskatzen direnak 2024an.

Urruneko ikastaroek eduki aurreratuagoak eskaintzen dituzte, beste modalitate batzuekin alderatuta. 2024an, gehien eskatu diren urruneko ikastaroak ofimatika, produktibitatea, programazioa eta garapena eta segurtasuna kategoriekin lotutakoak izan dira. Guztira, 2024an 1.834 pertsonari eman zaie formakuntza, 2023an baino ia 700 pertsona gehiagori.

Bideokonferentzia bidezko prestakuntzan, aurreko urteetako joerari jarraituz, modalitate honetan gehien eskatu diren ikastaroak aisia eta entretenimendua, produktibitatea eta ofimatika kategoriekin lotutakoak izan dira. 608 formakuntza-ordu eman dira guztira.

KZguneak eskaintzen dituen hitzaldiei dagokienez, 2024an 55 aurrez aurreko hitzaldi eman dira KZgunean, eta 80 zuzeneko hitzaldi eman dira Youtube @KZguneaTIC kanalaren bidez. Hitzaldiak emititu ondoren kanalean eskuragarri geratzen dira.

Gainera, KZgunearen tutoretza-zerbitzuak gorakada nabarmena izan du: 19.040 tutoretza eman dira 2024an, 2023an baino 5.000 tutoretza inguru gehiago. KZgunearen tutoretzei esker, 19.080 pertsonak Informazioaren eta Komunikazioaren Teknologiei buruzko zalantzak argitu ahal izan dituzte.

KZguneak 23 urte baino gehiago daramatza teknologia berrien ikaskuntzan formakuntza eta aholkularitza eskaintzen, euskal herritarrek eten digitala gaindi dezaten eta elkarrekin aurrera egin dezaten, teknologiak laguntza-tresna izan daitezen eta ez oztopo.