Gizarte digital batek sistema sendoak eta seguruak behar ditu

Maiatzaren 17an Telekomunikazioen eta Informazioaren Gizartearen Munduko Eguna ospatzen da, eta gizarte global digitalizatu bat mantentzeko eta babesteko azpiegitura sendo bat izatearen garrantzia azpimarratzen du aurten.

Gero eta digitalizatuagoa den mundu honetan, Interneten eta Informazioaren eta Komunikazioaren Teknologietan ikasteak duen garrantziaz sentsibilizatzeko, maiatzaren 17an Telekomunikazioen eta Informazioaren Gizartearen Munduko Eguna ospatuko da.

Aurtengo leloa "Bizitza-lerro digitalak mundu erresiliente eta konektatu baterako" da: gure egunerokotasunean bitarteko digitalak izatearen eta horiek eraginkortasunez eta segurtasunez nola erabili jakitearen garrantzia azpimarratzen du. Konektagarritasunaren mende gero eta gehiago dagoen gizarte global honetan, telekomunikazio-sare sendoak izatea premiazkoa da mundu osoan: teknologiak ez dira alderdi jakin batzuetarako tresnak soilik, ekonomiari, hezkuntzari, osasunari eta komunikazioari eusten dieten funtsezko zerbitzuak baizik.

Horregatik, Telekomunikazioen eta Informazioaren Gizartearen Munduko Egun honetan, teknologiak edo sistemek huts eginez gero, normaltasuna azkartasunez berreskuratzeko gaitasuna duten sistema sendoagoak, seguruagoak eta prestatuagoak eraikitzeko beharra azpimarratzen da. Alderdi hori erabakigarria da funtsezko zerbitzuak bermatzeko eta krisien eragina murrizteko.

Era berean, inklusio digitala sustatzearen garrantzia azpimarratzen jarraitzen da, pertsona eta komunitate guztiek teknologiak arintasunez eta eraginkortasunez erabili ahal izateko beharrezkoak diren tresnak eta ezagutzak izan ditzaten.

Horrelako nazioarteko egunen bidez, ekintzarako deia egiten da, Garapen Jasangarriaren Helburuak (GJH) lortzeko tresna digitalak erabiltzeko. Bestalde, KZguneak IKTei buruzko formakuntza eta aholkularitza eskaintzen die behar duten pertsona guztiei. KZguneak pertsonen beharrei erantzuten die, eta gaitasun digitalak eskuratzeko prozesuan animatzen eta laguntzen ditu, bai EAE osoan banatuta dauden gure zentroetan, bai modu telematikoan, gure online aholkularitzaren bidez.

Gero eta digitalizatuagoa dagoen mundu honetan, ezinbestekoa da pertsona guztiek teknologia independentziaz eta eraginkortasunez erabiltzeko beharrezko ezagutzak izatea: KZgunea zerbitzu publikoa pertsona horien guztien eskura dago.