Zalantza teknologikoak dituzu? KZguneak hauek argitzen laguntzen dizu

KZguneak aholkularitza-zerbitzu bat du, bai aurrez aurre, bai telefonoz, zalantza teknologikoak modu eroso eta eraginkorrean argitzeko.

KZguneak badaki herritarrek, Informazioaren eta Komunikazioaren Teknologietan trebatzeko beharraz gain, mundu teknologikoan sortzen zaizkien zalantzak eta oztopoak kontsultatzeko zerbitzu bat ere behar dutela. Horregatik, KZguneak, bere formakuntza-eskaintza zabalaz gain, aholkularitza-zerbitzua ere badu, bai aurrez aurre, bai telefonoz.

Oso zalantza espezifikoak eta tratatzeko konplexu samarrak dituzten pertsonentzat, tutoretza bidezko aurrez aurreko aholkularitza-zerbitzua da aukerarik eraginkorrena. Aldez aurretik hitzordua eskatuta, hezitzaileak gai dira modu bisualean erakusteko, adibidez, gailu mugikor baten doikuntza jakin batzuetara nola sartu, gailu batean bilaketa bat nola egin, edo aplikazio edo programa batean alderdi jakin batzuk nola konfiguratu.

Aitzitik, gailuak erabiltzeari, tresnak erabiltzeari edo gaitasun digitalei buruzko zalantza orokorragoetarako, batzuetan ez da beharrezkoa KZgune batera joatea. Hori dela eta, 945 062 555 aholkularitza-telefonoa dago, eta bertan hezitzaileek telefonoz argituko dituzte erabiltzaileak dituen zalantzak. Modalitate hori bereziki erakargarria da desplazamendu-arazoak edo ordutegi-bateraezintasuna dituzten pertsonentzat.

Bestalde, KZguneak ohiko galderen atal bat du bere webgunean, non argitu eta azaltzen diren erabiltzaile gehienek KZgunearen zerbitzuei buruz dituzten zalantzak, bai formakuntzan, bai aholkularitza-zerbitzuan bertan. KZgunearen formakuntza-eskaintzarekin, zerbitzuaren altarekin eta bajarekin edo harremanetarako bitartekoekin lotutako zalantzetarako, ohiko galderen atalean horri buruzko informazioa dago.

Gainera, sare sozialak eta KZgunearen bloga bi norabideko bitarteko gisa aurkezten dira. Bertan, KZguneak bere zerbitzuen berri ematen du, azken berrikuntza teknologikoen berri ematen du eta erabiltzaileei argitaratutako edukiari buruz sor dakizkiekeen zalantzak erantzuten ditu.

KZguneak kontuan hartzen ditu erabiltzaileek egiten dituzten formakuntzetan, tutoretzetan eta sare sozialetan planteatzen dituzten gaiak, eta astero bideotutorialak eta bideo animatuak sortzen ditu, gai horiek ikus-entzunezko moduan argitzeko. KZguneaTIC Youtubeko kanalak 200 bideotutorial eta bideo animatu baino gehiago ditu gailuen eta tresnen erabilerari buruz eta Informazioaren eta Komunikazioaren Teknologiekin lotutako berrikuntzei buruz.

Teknologiak sortzen dizun erronka edozein dela ere, KZgunea zugandik gertu dago, laguntzeko prest.